好開心今次可以跟埋 Oh爸媽 – ohpama.com 親子義工隊去彩虹邨做義工，一齊為公公婆婆送上端午節禮物包。
話說我媽媽係一個超級大好人，勁鍾意幫人，所以我都被感染有少少鍾意幫人嘅精神。我一直希望可以同Jasmine一齊做義工，幫到人之餘又可以令佢從中明白關愛社會精神，亦都可以透過活動接觸更多唔同嘅人和事。
今次活動我哋探訪咗幾位獨居老人，原來佢哋同我想像中嘅獨居老人性格好唔同。我以為獨居老人性格會比較內向，唔鍾意同人溝通，但原來剛好相反，佢哋性格好樂天，好正面，而且仲好犀利，不單止行動自如，仲可以自己做家務，去買餸煮飯睇醫生等，完全唔需要人幫，間唔中仲會落去中心做義工，我真係要俾十個叻佢哋呀！
相信最大功勞莫過於樓下嘅中心義工，佢哋得閒會同呢班長者傾下計，有咩事又可以提供支援，我完全感受到人間有愛呀！
雖然Jasmine仲細，唔係好知道發生緊咩事，但係公公婆婆見到佢都好開心，希望我哋將會有更多機會可以做義工，為長者帶來更多歡樂！也希望Jasmine將來可以回饋社會，幫助到有需要嘅人。
