生咗芊嶠•劻霖之後，間中都會想同老公出去拍下拖，今次老公就帶咗去佐敦嘅 Chelsea Garden & Restaurant 食好西！餐廳係上樓嘅，一入去見到個環境真係「嘩」咗出聲，俾人超舒服嘅感覺，戶外仲種咗好多植物，真係望住都就已經忘記哂啲壓力！
而我哋就揀咗食set，有頭盤、是日餐湯、主菜。
落完餐點，就會送上餐包，仲有兩種唔同嘅包。
而是日餐湯就係蘑菇湯，我就最鐘意配埋包一齊食！
頭盤我哋加咗錢要「香煎鴨肝伴無花果沙律」，鴨肝超級香，配埋無花果冇咁油膩，真心正！
主菜就揀咗「香煎牛腰脊肉伴芥末籽」，牛腰脊肉好「淋」，好香牛味，連啲配菜都超好味！
老公之後加咗「香辣烤八爪魚」，下面係薯蓉嚟㗎！估唔到呢個配搭又幾好味喎！
再嚟梗係要食隻「燒焗西班牙春雞」啦！唔會好咸，好香雞味！
呢個係散叫 menu。
餐廳嘅環境佈置都好靚，好舒服。
總結：呢餐真係好好味，由其係個牛腰脊肉，真係估佢唔到咁好食！下次要帶埋小朋友嚟食先得！
