雖然香港有非常多餐廳，但如果有一間係可以令到我再去第二次（日常lunch常去茶餐廳、食店除外），就一定真係好深得我心！今次時隔一年，我地再次黎到Chelsea Garden & Restaurant食晚餐、今次同上次唔同就係全場爆滿！ 最近餐廳推出左全新既Tasting Menu，可以選擇3/5 courses，全部都係main menu無既食物、另外再叫左一個墨汁西班牙飯。全部食物都非常精緻！
Tasting Menu
帶子慕斯配北海道鮮貝他他茴香白蘆筍
上層係北海道鮮貝刺身他他、中層係魚子醬、下層係帶子慕斯、最底係白蘆筍，非常層次分明。北海道鮮貝刺身他他非常香甜彈牙、魚子醬脆脆bo一聲口感、帶子慕斯軟綿、而白蘆筍爽脆。我自己本身唔係太食得生既魚、海鮮味，但呢個完全唔會腥！
慢煮紅蝦伴澳洲蘆筍配香芒汁
紅蝦非常鮮甜彈牙，蘆筍同蝦都幾match，而且香芒汁真係畫龍點睛！
蘇格蘭鮮蘆筍鷄肉清湯
清湯裏包含鷄肉、紅蘿蔔、蘆筍同西芹，非常清完全無味精，但又鮮甜。不過味道偏淡，如果呢個course係第一個上會更好！
慢煮海鰈魚柳伴荷蘭汁茴香泡沫
慢煮鰈魚肉質非常嫩滑彈牙，完全唔會糜同有魚腥味。就算伴碟薯仔都好軟好入味。荷蘭醬搭配魚肉非常match。而且會附上一杯白酒搭配魚肉享用！
法式焦糖杏仁芭菲
如其話係芭菲，比較似係慕斯/cream或者semifreddo，焦糖杏仁非常香、唔會過甜，搭配慕斯岩岩好。裏面加左D薄荷葉，味道比較特別，不過個人覺得唔加好似好D。
香烤墨汁西班牙飯
餐廳有兩款西班牙飯選擇，一款係龍蝦西班牙飯、搭配幾款海鮮，而另一款就係呢款香烤墨汁西班牙飯。使用墨汁煮西班牙飯味道咸香濃郁，搭配辣肉腸，多左一份特別口感，而且魷魚分量好多，而且有口感！
